‘Oku mahu’inga ke fakafoki ‘etau manatu ki he popoaki na’e fakmafola meihe Letio Tongaa ‘ihe ‘aho Pulelulu, ‘aho 15 mo e Tu’apulelulu, 16 ‘o Novema 2006.  Koe konga oe popoaki ko ‘eni ke fakataha ki Pangai ‘a kinautolu ‘oku poupou kihe pule’anga lolotonga.

‘Oku mahino koe uki ‘oe fakataha ko ‘eni, ko hono taumu’aa ke fakafepaki’i ‘ae fakataha anga maheni ‘ae kau fakafofonga ‘oe kakaii mo e kakaii ‘aia ‘oku fai ma’u pe ‘i Pangai Si’i, na’e ‘osi fanongonongo meihe TV OBN ‘ihe polokalama ‘ae kau fakafofonga ‘oe kakai.

‘Oku mahu’inga ke fakatokanga’i koe pena koia na’e fakahaahaa ‘ehe ki’i kakai na’e ’ikai a’u hono tokolahii ki he took 20, na’e ta ia meihe Molisi Tonga.  ‘Aia, ko e fakataha ko ‘eni, ko hono mo’oni, na’e kau ‘a e Palemia ‘i hono fa’ufa’uu.  Pea ‘oku fakamo’oni’i ia ‘ehe pena na’e ta meihe Molisi Tonga.  Pea kapau na’e ‘ikai kau fakahangatonu, he fa’ufa’uu, na’e ne tokoni’i ke fakahoko ‘a e fakataha fakamoveuveu ko ‘eni.

He ‘ikai hala ketau pehe, ko e kamata’anga ‘oe moveuveuu na’e hoko ‘ihe ‘aho 16, koe ngaue ‘a e ki’i kulupu tokosi’i ko’eni, na’e taki ai ‘a e Faifekau maloloo ko Siaosi Palu.  Pea ko e Palemiaa, e pau ke hilifaki ki ai ‘a e kamata’i ‘oe moveuveu, he koia ‘oku Sea ‘i he Poate ‘a e Letio Tonga.  Na’a ne faka’ataa ke fanongonongo ke fakahoko ‘ae fakataha fakafepaki ko ‘eni.

Na’e totonu ke mahino ki he Palemia, e lava ke hoko ha moveuveu ‘ihe to e uki moe fakataha fakafepaki ke fakahoko pe ihe feitu’u tatau moe ‘aho tatau, ta’e ‘iai ha taumu’a mahino mo pau.

‘Ikai koia pe, ka na’e toloi ‘ae fakataha ‘a e Fale Aleaa tupu meihe ongo’i ‘ehe kau Minisita ‘oku ‘ikai tokua tenau malu tupu mei he fakataha na’e fakahoko .i Pangai Si’i.  Kapau koe ‘uhinga ia, koeha ne faka’ata ai ke fakahoko mo e to e fakataha fakafepaki ‘e tahaa.  ‘Oku mahino heni ‘ae fa’ufa’u ke fakatupu e moveuveu ‘ehe pule’anga ke makatu’unga ai hano ta’ofi ‘a e fakataha ‘a e kau fakafofofnga moe kakai.

Koe fehu’i ‘e taha,, koe fe leva ‘ae kakai ‘oku nau poupou’i ‘ae pule’anga lolotonga?  Ne ‘osi talaki pea fanongonongo ‘ihe letio ‘a e fakataha ‘a e kau poupou kihe pulle’anga lolotonga, pea ko hono tokolahi pe ‘ena na’a nau iku matuku ‘o lele.

Koe fehu’i ki he Palemia, kapau koe mo’oni ia na’e ongo’i ‘ehe kau Minisita ‘oku ‘ikai te nau malu ‘o tupu ai ‘a e toloi ‘a e fakataha ‘a e fale alalea ko e ha ne mou uki ai ‘e moutolu ‘a e kakai ‘oku nau poupou ki he pule’anga ke fakatupu ‘a e moveuveu ‘i he ‘aho 16 ‘o Novema.  Pea ‘ikai te mou kau mo moutolu he fakataha koia, kamou hola moutolu kae fua ‘ehe ho’omou kau poupou ‘a e faingata’a?  Ko e ha ho’o taumu’a ne ke faka’ataa ai ke ta mai e pena fakafepaki mei he Molisi Tonga?  Pea ‘ikai te ke ha’u mo koe ‘o tokoni ki a Siaosi Palu ke uki ke tokolahi ‘a e kau poupou ki he pule’anga?

 

‘Oku totonu ke puke mo e Palemia ‘o Tonga Dr. Feleti Sevele ‘o fakahu pilisone, he na’e kau moia ‘ihe fakatupu ‘oe moveuveuu.

 

Article:  Kele’a Newspaper