Na’e to e kole ‘a e kau polisi ke tauhi ‘a ‘Akilisi Pohiva ‘i he uike ‘e 2 pe ko e ‘aho ‘e 14 pea toki vakai ai, pea na’e tu’utu’uni ‘e he fakamaau Polisii, Salesi Mafi ke tauhi pe he ‘aho 7, ka na’e ‘ikai tali ‘ehe fakamaau lahi ‘a e fokotu’u koiaa.  Ko e ‘aho pe ‘e ua na’e tauhi ai ‘Akilisi Pohiva ‘i he pilisone pea tu’utu’uni ‘ehe fakamaau lahi ke tukuange.

Na’e taki foki ‘ehe kau Polisii ‘a e Fakafofonga fika 3 ‘o Tongatapu Clive Edwards ‘i he ‘efiafi Falaite ko hono 2 ‘o Fepueli 2007.  

Ko e taki ko ‘eni ‘o Clive na’e makatu’unga ia ‘i ha ongo ‘uhinga ‘e ua:  ‘Uluaki, na’e makatu’unga ia fekau’aki mo ha ongo tohi fuakava ‘a ha ongo ‘ofisa Polisi ‘o pehe na’e fa’ufa’u ‘a Clive ke uesia ‘a e fakamo’oni ‘a e kau Polisii.  ‘Oku makatu’unga ‘a e tukuaki’i ko’eni ‘ehe kau Polisi ‘a Clive mei ha tohi ‘a ‘Isileli Pulu ki a Clive Edwards ‘aia na’e ma’u ia ‘ehe kau Polisi.  Ko e ‘uhinga hono ua: Na’e pehe ‘ehe kau Polisii ‘oku kei to e lahi ‘a e ngaue fakalao ke fakahoko ki he fakafofongaa.  

Na’e kole ‘ehe kau polisi ki a Fakamaau Polisi Salesi Mafi ke tauhi ‘a Clive mei he po Falaite ko hono 2 ‘o Fepueli, ke a’u ki he ‘aho Monite ko hono 5 ‘o Fepueli.  Na’e tali ‘e Salesi Mafi ‘a e kole ‘a e kau polisi.  Neongo na’e tautapa ‘a Clive ke ‘ai mu’a ke fai ha’ane tali ki he me’a kuo talatalaaki’i kiai ia ‘ehe kau Polisi, ka na’e ‘ikai tali ‘e Salesi ‘a e kole ‘a Clive - ‘aki ‘ene pehe kuo ‘osi mahino ‘a e fakamo’oni kuo ‘oange ‘ehe talatalaaki ke makatu’unga ai ‘ene fai-tu’utu’uni. Na’e pehe ai ‘e Clive kia Salesi Mafi, ne ‘osi li kitu’a ‘ehe Tu’i Fakamaau Lahi ‘a e ongo tohi fuakava koee ‘e ua na’e fakahu ‘ehe talatalaakii, ‘i he hopo kole malu’i ki tu’a ‘o ‘Isi Pulu pea kapau ‘oku li ‘ehe Fakamaau Lahi ‘a e ongo tohi fuakava koiaa kitu’a, ko e ha  ‘a e ‘uhinga ‘oku tali ai ‘e iaa.  Na’e tu’utu’uni ‘ehe Fakamaau Lahi, ke faka’ataa ‘a Clive ‘i he ‘aho Tokonaki pe.

 ‘Oku ‘iai leva ‘a e fehu’ia pe ko e ha nai hono ‘uhinga ‘oku fa’a toutou fakata’e’aonga’i ai ‘ehe Tu’i Fakamaau Lahii ‘a e  kole mei he kau polisi?  Pehe ‘e ‘Akilisi Pohiva ki he TNEWS, ‘oku ‘iai ‘ene fakamahamahalo ko hono ‘uhingaa mahalo ‘oku ‘ilo pe ‘ehe kau polisii ia ‘a e me’a ke faii ka ‘oku ‘iai ha fa’ahinga pressure mei ‘olunga mei he kau takii.  Ka e pango he ko e Tu’i-Fakamaau Lahii ia ko e palangi pea ‘oku ki’i tau’ataaina ange ‘ene faitu’utu’unii ‘a’anaa.

 

Setita Millar