Kuo holomui ‘a e kautaha Nu’usila koia ko e Northpower mei hono fakatau ‘a e kautaha ‘uhila ‘a e tama Tu’ii ‘aia ‘oku ‘iloa ko e SHORELINE.  ‘Oku makatu’unga foki ‘a e holomui ko ‘eni ‘a e Northpower tupu ia mei he maumau na’e fakahoko ki he Shoreline ‘I he ‘aho 16 ‘o Novema.  Pehe foki ‘ehe Northpower, ‘oku ‘ikai ko ha taimi lelei ‘eni ke fai ai ha fefakatau’aki lolotonga ‘a e feinga ‘a Tonga ke langalanga fo’ou mei he vela na’e hokoo.  ‘Oku ‘ikai ai ke nau falala ‘oku tu’u ‘a e tu’unga fakapa’anga ‘a Tongaa ‘i ha tu’unga fakafiemalie ke ‘inivesi ai ‘enau kautahaa.  Na’e ‘osi fakamo’oni foki ‘a e Northpower ki he ‘uluaki sitepu ‘o e aleapau ko ‘enii. ‘Oku hanga ‘ehe holomui ‘a e Northpower ‘o fakavaia’i ‘a e malohinga fakapa’anga na’e mei ma’u ‘ehe tama Tu’ii ‘aia ko e lau miliona.  Na’e fengaue’aki vaofi foki ‘a e Northpower pea mo e Shoreline ki mu’a pea ‘oku lolotonga fakangaue’i ‘ehe Northpower ha fanau Tonga ‘e toko 23 ‘aia na’a nau ngaue pe he shoreline ki mu’a.