MO’UIFO’OU CHURCH LOST THEIR LEGAL BATTLE TO SECURE LAND and CHURCH BUILDINGS IN HA’ATEIHO

0

Kuo Ikuna Siasi Tokaikolo hopo mo e Feohi’anga Mo’ui Fo’ou ‘Ia Kalaisi
‘O fakatatau kihe fakamatala ‘ae Nipitune, kuo tu’utu’uni ‘e he Tu’i Fakamaau Lahi Owen Paulsen ‘i ha’ane tu’utu’uni tohi peesi ‘e 56 ‘i he ‘aho ni ke fakafoki katoa ‘a e koloa ‘a e Siasi Tokaikolo ‘Ia Kalaisi ‘a ia ‘oku lolotonga puke mo tauhi ‘e he Feohi’anga Mo’ui Fo’ou ‘Ia Kalaisi pea kuo ikuna ‘ae Siasi Tokaikolo.
Ko e hopo foki ‘eni ‘a e ongo tafa’aki ‘i he koloa ‘a e Siasi Tokaikolo ‘Ia Kalaisi ‘a ia na’e mavahe mo kinautolu na’e mavahe ‘o fokotu’u ‘a e Feohi’anga Mo’ui Fo’ou ‘Ia Kalaisi ‘o taki ai ‘a Sione Havili Maile. Ko e Talatalaki ‘i he hopo ko’eni ko e Siasi Tokaikolo ‘Ia Kalaisi pea ko e kau Faka’iloa ko Sione Havili Malie, Sione Foliaki ‘Amanaki, Feohi’anga Mo’ui Fo’ou ‘Ia Kalaisi pea mo e Minisitā Fonua.
Na’e kamata foki ‘a e hopo ko’eni he mahina ko ‘Aokosi ‘o e ta’u ni pea na’e toloi mai ‘a hono tala ‘o e tu’utu’uni ‘o toki fakahoko ‘i he aho ni. Ko e ‘isiū mahuinga foki ‘i he fakatonutonu ko’eni ko hono ‘eke ‘e he Tokaikolo ke fakafoki ange ‘a e koloa ‘a e Siasi ‘a ia ‘oku tu’u ‘i Ha’ateiho pea na’e tauhi mo ma’u ‘e he kau mavahe mei he Siasi Tokaikolo talu mei he mahina ko Siulai 2013.
Ko e koloa ko’eni ‘oku kau kiai ‘a e Falelotu, ‘Apiako, ‘Api Nofo’anga Faifekau pea mo e Holo. Na’e fai foki ‘a e kole fakamolemole ‘a Sione Havili Maile mo e ni’ihi ‘o e Feohi’anga Mo’ui Fo’ou ‘Ia Kalaisi ‘i he konga ki mui ‘o e 2015 mo kole ke foaki ange ma’a kinautolu ‘a e koloa na’a nau mavahe moia.
Na’e ‘ikai tali ‘eni ‘e Dr. Liufau Vailea Saulala mo e Siasi Tokaikolo kae ‘oua kuo tu’utu’uni kiai ‘a e Konifelenisi ‘a e Siasi ‘o fakatatau mo e Konisitūtone. Na’e ‘ikai tali ‘e he Konifelenisi ‘a e Siasi ‘a e kole he na’e tu’u fehu’ia ‘a e tu’unga ‘o Sione Havili Maile pea na’e ‘i ai ‘a e ni’ihi na’e ‘ikai loto ki he ha’u ‘a Sione Maile ‘o kole fakamolemole.
Ko e mavahe ko’eni na’e taki ai ‘a e Sekelitali malōlō ‘a e Siasi Tokaikolo Sione Havili Maile pea kau kiai mo hono kau muimui. Na’a nau fekau’i foki ke mavahe ‘a kinautolu ‘oku nau kei fiepiki ki he Siasi Tokaikolo mei he koloa mo e ‘api ko’eni ‘oku fai ai ‘a e fakatonutonu ‘i Ha’ateiho.
‘I he palakalafi 31 ‘o e tu’utu’uni ‘a e Tu’i Fakamaau Lahi ai pe ‘a ia ‘oku ha he peesi 35 ‘oku hā ai ‘a e fakamatala ko’eni –
‘I he fakaikiiki leva ‘a e tu’utu’uni ‘a e Tu’i Fakamaau Lahi na’e anga pehe ni leva –
(a). ‘Oku talaki ko e Siasi Tokaikolo ‘oku ‘i ai ‘enau totonu fakalao ki he koloa ‘a e Siasi ‘i Ha’ateiho pea fakafoki leva kiai ‘a e koloa.
(e). Ke mavahe leva ‘a e kau memipa ‘o e Feohi’anga Mo’ui Fo’ou ‘Ia Kalaisi mei he koloa ‘a e Siasi Tokaikolo ‘i Ha’ateiho ‘i loto ‘i he ‘aho ‘e 30 ‘o kamata lau mei he ‘aho ni.
(f). Ke lēsisista leva ‘e he Minisitā Fonua ‘a e lisi ‘o e koloa ‘i Ha’ateiho ‘i he malumalu ‘o e Siasi Tokaikolo ‘Ia Kalaisi ‘a ia na’e fakamo’oni kiai ‘a Sione Havili Maile mo e Minisitā pea paasi ‘e he Tu’utu’uni Kapineti Fika 928.
(h). Ko e fakamole ‘a e Tokaikolo ’e fua kotoa ia ‘e he kau Faka’iloa ‘o e Feohi’anga Mo’ui Fo’ou ‘Ia Kalaisi
Na’e fakafofonga’i ‘a e Talatalaaki ‘e William Clive Edwards Sr. ‘a e Talatalaaki (Siasi Tokaikolo) pea ko Laki Niu ma’ae tafa’aki ‘a e Taukapo (Feohi’anga Mo’ui Fo’ou ‘Ia Kalaisi).

‘Oku te’eki ai foki ke mahino pe ‘e toe fakahoko ha tangi ‘ae Siasi Mo’uifo’ouu pe ‘ikai.

Comments

comments

Share.