Lisi taki ta’u 40 ngaahi konga’api ‘e 100 na’e tofi ‘i Patangata

0

KUO kamata ‘a hono lisi atu ‘e he Pule’angá ‘a e ngaahi konga ‘api taki pole ‘e 20 ‘e 100 na’e tofi ma’ae kāinga ‘o Pātangatá ‘i he uiké ni ‘i he mahu’inga ko e $80 ki he ta’u ‘a ia ko e $3,200 ‘i he ta’u ‘e 40 ka hokó.

Ko e mahu’inga pē eni kuo fakamahino mei he ‘Eiki Minisitā Fonuá, Saveá mo e ngaahi Koloa Fakaenatulá, Lord Mā’afu ke lisi ai ‘a e ngaahi konga tofi ko ení ‘i he lōloa ko e ta’u ‘e 40.

‘I he ‘aho Mōnité na’e kamata lisi ai ‘a e ngaahi ‘api ‘e 30 pea ‘api ‘e 30 mo e Tūsité pea toki faka’osi leva ‘a e toengá ‘i he Pulelulú. Ko e totongi makehe pē na’e kau ki hení ko e $46 ‘a ia ko e totongi ia ‘o e tofí.

Ko e sitepu faka’osi eni ki he ngaahi konga ‘apí talu ‘a e kamata mai ‘a e ngāué ‘i he konga kimu’a ‘o e ta’ú ni.

Neongo na’e kei ‘i ai pē ‘a e ta’efiemālie ‘i he kāingá koe’uhí ko e fētukuaki holo pē ‘i he ngaahi kongá, ka kuo fakamulituku ‘e he ‘Eiki Minisitā mo ‘ene Potungāué ‘a e vahevahé pea kuo maau kotoa ia.

Ko e ngaahi konga ‘e ni’ihi kuo ‘osi kamata ‘a e ngāue ia ki ai ‘a e fa’ahinga kuo nau lisí ‘o kamata ‘a e ni’ihi ia ke langa ki ai ha ki’i palepale pea tō ‘akau e ni’ihi ia kae toki fakahoko e langá ‘a mui ‘oka faingamālie fakapa’anga.

Na’e fakahā ‘e ha taha ‘o e fa’ahinga kuo kau hono lisi atu ‘a e ngaahi ‘apí (‘ikai tuku atu e hingoá) ‘oku nau fiefia ‘aupito he kuo mahino eni kuo ‘i ai ‘a e ngaahi konga ‘api kuo tofi pea maau hono ngaahi me’a fakapepá (lisi) pea ko e ‘ofa lahi ‘a e ‘Eiki Nōpelé (Lord Ma’afu) ‘i hono ‘omai ‘a e ki’i totongi lisi fe’unga ko ení pea ‘ikai fakahoa atu ia ki he taimi ‘oku ‘omai ai kemau takitaha nofo ‘i hono kelekele ‘i he ta’u ‘e 40 ka hokó.

‘Oku ‘ikai foki ke lava ‘o lēsisita ‘a e ngaahi konga ‘apí he ko e tu’utu’uni ‘a e laó ke a’u ‘o pole ‘e 30 pe lahi ange pea toki lava ‘o lēsisita ha konga ‘api ka koe’uhí ko e taki pole pē ‘e 20 ‘a e ngaahi kongá pea ko e foungá pē eni ko hono lisi atu.

‘Oku te’eki mahino ‘a e hoko atú ‘i he hili ‘a e ta’u ‘e 40 ‘o e lisí pē ko hono toe fakalōlōa ‘a e lisi ko ení.

Comments

comments

Share.