‘Ave ki he Fakamaau’anga Lahi ‘a e hopo ‘a e kau Liahona

0

Mei Kele’a Tonga:

Kuo mahino mai ʻe ʻave hangatonu ʻa e hopo ʻa e fānauako Liahona ʻoku tukuakiʻi ki he fakataha fakamoveuveu ʻi ʻEpeleli ʻo e taʻú ni ʻi Havelu ki he Fakamaauʻanga lahí ke toki mahino mei ai pē ʻe to e fakafoki hifo ha hopo ha niʻihi ki he Fakamaauʻanga Polisí pē ko hono fakamaauʻi fakaʻangataha aipē kinautolu ai ʻo hilifaki mo ha tautea kenau ako mei ai.

Ko e toko 10 naʻe fakafofongaʻi fakalao mai ʻe Sifa Tuʻutafaiva talu mei he kamata ʻa e hopó ʻoku kau ki ai ʻa Paula Tuʻutuʻu, Sione Moala Fonua, Sione Malamala, Penihea Piutau, Tali Taulafo mo ʻEtimoni Havea.

Ko e toko 6 ko ia naʻe fakahā ʻe Tuʻutafaiva ki he Fakamaauʻangá kuó ne ʻosi faleʻi ʻa e kau fakaʻiloa koʻení hili ia ʻene lau ʻenau pepa fakaʻiló ʻo mahino mai ʻoku ʻiai ʻa e fakamoʻoni feʻunga ʻa e kau Polisí ke ʻaveʻaki ʻenau hopó ki he Fakamaauʻanga lahí pea kuo ne to e faleʻi kenau tali Halaia ki he hiá.

Ko e toengá ko Soatame Taufa, Tohi Angilau mo Tai Lausiʻi ko e niʻihi ko ʻení naʻe fakahā ʻe Tuʻutafaiva ki he fakamaaú ʻokú ne fakafoki atu hono fakafofongaʻi ʻa e toko tolu ko ʻení he ko e talu pē hono talaange ʻi he kamata ʻo e hopó ke ne fakafofongaʻi kinautolú pea nau ʻalu ʻikai ha to e fetuʻutakiange.

Ko e talavou fakaʻosi ʻi he niʻihi ʻoku fakafofongaʻi ʻe Tuʻutafaivá ko Ulaea Pāhulu ʻaia naʻe fakahā ʻe he loea taukapó ki he Fakamaaú ʻokú ne fakafepakiʻi ʻa e tukuakiʻí mo fokotuʻu naʻe ʻikai ha fakamoʻoni ʻe hā ʻi he pepa naʻe tufaange ki he fānaú ʻo lave fekauʻaki mo Pāhulu naʻe ʻiai haʻane kaunga ki he hiá. Naʻe aʻu ki he fakaʻekeʻeke naʻe fakahoko ʻe he kau Polisí naʻe kei fakaʻikaiʻi pē ʻe Pāhulu naʻe ʻikai ke kau he hia ʻoku tukuakiʻi fakataha ki ai mo hono ngaahi kaungā tangatá.

Ko e toenga ʻo e kau fakaʻiloá ʻoku ʻikai ke ʻiai haʻanau fakafofonga lao ʻoku kau ki ai ʻa Kālisi Pole, Sione Vea, Viliami Fifita, ʻAlipate Talau, Kihoi ʻAnitoni, Tevita Fiuʻafili, Siaosi Faletau, Viliami Vaitaki Tupou, Peni Vaise, ʻAtieli Tulikihakau, Viliami Lātū, Samuela Pupu, Taniela Uasikē, ʻAisea Uele, Taniela Tuʻimā, ʻAle Vaioleti, Sitaleki Mafi, Paula ʻIloa mo Kalosi Tupoutoʻa.

Naʻe kole ʻa ʻInisipēkita Mema Lātū ke ʻave fakataha ʻa e niʻihi ʻoku fakafofongaʻi ʻe Sifa Tuʻutafaivá mo e niʻihi ʻoku ʻikai haʻanau fakafofonga laó ke fakamaauʻi ʻi he Fakamaauʻanga Lahí pea naʻe tali ia ʻe he Fakamaau Polisi Lahí Lokotui. Naʻe to e kole ʻe Mema Lātū ke tukuange ha mahina ʻe 12 ka e lava ke ngāue ʻene kau ngāué ki he pepa ʻe fakahūʻaki ʻa e hopó ki he Fakamaauʻanga Lahí he ʻoku fuʻu tokolahi ʻa e kau fakaʻiloá.

He kuopau ke ʻai ʻa e tatau ʻe tolu ʻo e pepa ki he fakamaauʻanga lahí.

Naʻe fakahā ʻe Fakamaau Lokotui ʻoku fuʻu fuoloa ia he naʻe ʻosi ʻiai ʻene fakahū ʻa e hopo kimuʻa atu ki he Fakamaauʻanga lahí naʻe fakahū ʻaki ʻa e pepa pē ʻe taha. Naʻe tokoni hake ʻa Semisi Lutui ki he fakamaaú ʻoku ʻiai pē taimi ia ʻoku fiemaʻu ai ʻa e ngaahi tatau ʻo e pepá ke tolu mo ʻiai e taimi ʻoku fiemaʻu pē ke taha. Ka kuopau ke ʻave ia ki he kau ngāue ʻa e Fakamaauʻanga Lahí kenau ai ki ai ʻa e fika hopo ʻa e Fakamaauʻanga Lahí pea toki fakafoki ki he ʻofisi ʻa e Kalauní kenau teuteu ʻa e ngaahi ʻelemēniti ʻe fiemaʻu ki he ʻaho hopó.

Ka naʻe fakahā ʻe ʻInisipēkita Mema Lātū ki he Fakamaauʻangá naʻe fakataha fakamuimui mo e Tuʻi Fakamaau lahí CJ Paulsen peá naʻe fakahā ai ʻoku fiemaʻu ʻa e tatau ʻe tolu ʻo e pepá ke fakahūʻaki e hopó ki he Fakamaauʻanga Lahí. Ko e ngaahi tatau ko iá ʻe 3 ʻe fiemaʻu ai ha tatau ʻo e pepa ko iá ke ʻave ki he fakaʻiloá, taha ʻa e Kalauní pea taha ʻa e Fakamaau Lahí.

Naʻe to e lave ʻa ʻInisipēkita Lātū ki he foʻi fakahū pepa naʻe lau ʻe Fakamaau Lokotuí mahalo naʻe ʻosi toʻo ʻa e tatau ia ʻa e pepa ki he fakaʻiloá mo e kalauní ka e to e pē tatau tohi ʻa e Fakamaau Lahí. Naʻe fakahā ʻe Fakamaau Lokotui kapau ko ia pea fakahoko ke maau ʻa e ngaahi pepa ko iá ke fei mo fakahū ʻa e hopo ʻa e fānaú ki he Fakamaauʻanga Lahí ke mahino mei ai haʻanau ʻaho hopo.

Ka naʻe fakahā ʻe Mema Lātū ko e ʻaho 23 ʻo Nōvemá ko ʻene aʻu ki aí kuo maau ʻa e ngaahi fiemaʻu fakapepa ko iá. Naʻe fakalōlōa aipē ʻa e maluʻi ʻa e fānau takitaha ʻi he tuʻunga tatau ka e tuʻutuʻuni ke tohi puke mai ʻa Tohi Angilau, ʻAlipate Talau mo Kalisi Pole ʻo fakahū ʻi pilīsone. Naʻe fakaʻosiʻaki pē ʻe he Fakamaaú ʻene tokanga ki he talavou ko Ulaea Pāhulu ke toki fakamahino mai ʻe he Talatalaakí he ʻaho 23 pē tamateʻi ʻa e tohi fekaú ka e tukuange ʻa e fakaʻiloa pē ko ʻene kau fakataha mo e toenga ʻo e fānaú ʻi he ʻave ki he Fakamaauʻanga lahí.

 

Comments

comments

Share.