Hounga’ia Tonga he nimahomo ‘a e timi tafa mafu

0

Na’e mei fakamoleki ‘e he ngaahi fāmili ‘a e kau mahaki ‘e toko 29 na’e ta’imālie ‘i he tokoni mo e ‘ofa ‘a e timi tafa mafu Open Heart Operation (OHI) mei ‘Aositelēliá ‘a e pa’anga laui miliona kapau na’e fakahoko honau ngaahi faito’ó ni ‘i ha ngaahi falemahaki ‘i Nu’usila pē ‘Aositelēlia, ka ko e totongi ‘o e faito’o kotoa ko ení ko e fakamālō’ia pē mo e hounga’ia.

Na’e me’a tonu foki ‘a e ‘Eiki Palemiá, Samiuela ‘Akilisi Pohiva ki he loki tafá ‘o me’a ki he ngāue ‘a e timí pea ko e hounga’ia lahi na’á ne fakahā ki he timí ‘i he’enau tokoni kuo fai ma’ae kakai ‘o Tongá

Ko e kotoa ‘a e ngāué ni ko e ‘ofa pē pea ko e kau ngāue kotoa ‘e toko 49 ko e kau pole mei he ngaahi falemahaki ‘o ‘Aositelēliá lolotonga ‘enau taimi ‘atā mo e mālōlō mei he’enau ngāué.

Ko e ta’u si’i tahá ko e ki’i pēpē māhina 4 ‘o lele ai pē ki he lahi tahá ko e ta’u 59 pea ko e ngāue mo e tafa na’e fakahoko ki he toko 29 ko ení na’e fakahoko pē ia ‘i loto ‘i he ‘aho ‘e 11.

Kaekehe ‘oku hounga’ia ‘a e timí ‘i he anga talitali kakai lelei mo e anga fakakaume’a ‘ae Tongá pea ‘oku ne fakapapau’i ai ki he timí kenau toe foki mai ki Tongá ni ‘i he 2017 ke toe hoko atu ‘enau tokoni ki hono faito’o ‘a e si’i kau fokoutua fakalotofonua ‘i Tongá ni.

Comments

comments

Share.