Toho kaulei ‘a Clive Edwards mo ‘Akilisi pea mo e Kapineti

0

Source:  From Kele’a Newspaper:

Kuo tukumai ‘e Davids Edwards pea mo ‘ene Fakafofonga Laó, William Clive Edwards ha fakamatala ‘o fakahalaki ‘a e tukuaki‘i ‘oku fakahoko ‘e he Kapinetí ki he Pule Malōlō pea toe Sea ‘i he Tonga Forest fekau‘aki mo e tukuaki‘i ‘oku pulia ‘o ‘ikai ke toe ‘iai ha fakamatala ‘i he Tonga Forest ‘e haá ai e fakamatala ki he noó pa‘anga ‘e $4.9 miliona ‘a e kautahá, pea toe tanaki ki ai ko e ‘ikai ke haá ‘a e pa‘anga totongi tupu ‘e $2 kilu ne totongi ki he Pangiké Fakalakalaka ‘a Tongá.

‘I he fakamatala falala‘anga ‘oku ma‘u ‘e he Kele‘á na‘e fakahoko ‘a e fokotu‘u tu‘utu‘uni ‘a e Palēmiá ki he Kapinetí ‘i he ‘aho 15 ‘o Sune 2015. Ko e taumu‘a ‘o e fokotu‘ú ‘i he ‘uhinga fakafelave‘i mo e founga fakalele ‘o e kautaha.

‘I he taumu‘a ‘o e fokotu‘ú ke fakahā ki he Hou‘eiki Kapinetí ‘a e fakamatala ngalingali pē ko ia ‘oku fai ‘a hono ngāue hala‘aki ‘o e mafai pē hingoá mo e ngaahi fakamatala ki he kautahá ‘o maumau ai ha ongoongo.

Fakatatau ki he fakamatala falala‘anga ‘oku ma‘u ‘e he Kele‘á, na‘e fokotu‘u ki he Kapinetí ha fo‘i fokotu‘u ‘e 4.

‘Uluakí, ke fakahoko ha launga ki he kau polisí ke puke ‘a e tokotaha tukuaki‘í ko Glenda Hiyao (Pule Tafa‘aki Pa‘angá- TFPL) pea mo Davids Edwards ki he feitu‘u ‘oku ‘iai ‘a e ngaahi fakamatala fekau‘aki mo e ngaahi failé.

Ua, Ke fakahū ha kole ki he Fakamaau‘angá ki ha tohi hua ‘i he ‘api ‘o e ongoua tukuaki‘í ke ma‘u mai ‘a e faile fakamatala pa‘anga mo e ‘Akauní.

Tolú, ke fai ha ngāue fakalao kia Glenda Hiyao mo Davids Edwards fekau‘aki mo hono tukuaki‘í ki he fakmatala hala mo ‘ikai ke mo‘óni ki he ‘akauní mo e lekooti fakamatala pa‘angá pea mo ha tukuaki‘i pē fekau‘aki mo e Tonga Forest.

Pea ‘i he tukuaki‘í fakamuimui ne fakahā ai ‘e he Palēmiá, ke fokotu‘u ha tohi ta‘ofi ke ‘oua ‘e toe folau ‘a e ongo tukuaki‘i ki muli kae ‘oua kuo fakahoko ‘a e hopó.

Kaekehe ‘oku hā ‘i he fakamatala ‘oku ma‘u ‘e he Kele‘á na‘e kamata ‘a e tukuaki‘í ko eni mei he ‘atikolo na‘e paaki ‘e he Kele‘á ‘i he ‘aho 11 ‘o Meé (Kele‘á Vol 31 No.19, 2015).

Fakafoki ki he tali kuo tuku mai ‘e Clive Edwards ‘oku ne pehē ai na‘e fai ‘a hono momoi atu ‘a e ngaahi naunau ‘a e kautaha ki he Pule KauNgāué (Human Resource Manager) pea ‘oku tonu ke ‘eke ki he Pule Fisi ko Sevanaia Tawake he ‘oku ne kau pē ‘i he fakamo‘oni ki he ngaahi me‘a fakapepa ki he kautaha.

Ko e fehu‘i leva mo e fifilí, ko fe‘ia leva ‘a e naunau ko iá, kuo tala ai mei he Tonga Forest ‘oku ‘ikai ha naunau ai?

‘Oku hā ‘i he ngaahi fakamatala poupou ‘i he fokotu‘u ki he Kapinetí, na‘e fakahoko ‘e ‘analaiso ‘o e fehū‘aki ‘a e pa‘anga ‘i he faka‘osinga ‘o Suné ‘e he Sea ‘o e Tonga Forest pea na‘a ne fakahū atu ki he Pangike Fakalakalaka. Na‘e fakahā mei he Pulé ko e mo‘oni ‘a e ‘analaiso ‘oku fai pea ko e mo‘oni ‘oku te‘eki ke ma‘u ‘e he Pangiké ‘a e pa‘anga ‘e $ 2 kilu tupu ko iá.

Kaekehe ‘oku paaki atu ‘e he Kele‘a ‘a e ngaahi tali ‘oku fakahoko mei Davids Edwards kae pehē ki he Fakahinohino Lao pea kau ai foki mo e ngaahi Nusipepá. Ka koe me‘a fakaolí ‘oku cc ki he pepa kehe kae ‘ikai ke kau ai ‘a e Kele‘á ia, tukukehe ange hono toki ‘imeili‘i mai ki he Kele‘á meia Davids ‘a e ngaahi tohi.

Kuo ‘osi fakahā foki mei he Pule Pangiké koe mo‘oni ‘oku te‘eki ke totongi ‘a e totongi noó fe‘unga mo e pa‘anga ‘e $279,850.59. “ Confirmed as correct Loan Accured interest amount of $279,850.59 recorded in 2013 is still unpaid”

Taimi tatau ‘óku mahino ko e fetukuaki ko ‘ení ‘e vete mei falehopó, neongo kuo fakahā ‘e Clive tene faka‘ilo fakataautaha ‘a ‘Uhila pea mo e Pule‘angá ‘a ia koe Ma‘u ‘Inasi lahi tahá ia he Tonga Forest.

Comments

comments

Share.