Tuku ke mole ‘ene mo’uí, kae fakahaofi ki’i tamasi’i ta’u 13

0

Naʹe mālōlō ha matāpule taʹu 30 mei Teʹekiu ko haʹane melemo ‘i he matātahi Fotuá ‘i Kalaʹaú tupu mei haʹane feinga ke siʹi kaufakiʹi ki ‘uta ha kiʹi tamasiʹi taʹu 13 naʹe tafia ‘e he ‘aú.

Ko e meʹa eni naʹe hoko ‘i he ‘aho Pulelulu 14 ‘o Tīsemá lolotonga ha kemi fakafeohi ‘a e toʹutupu ‘o e Siasi Māmonga ‘o Teʹekiú ki he matātahi Fotuá.

Fakatatau ki he fakamatala kuo tuku mei he kau polisí, naʹe feinga ‘a e pekiá (Sioseti Koluse) ‘a ia ‘oku toe ‘ilo ‘aki ‘a e hingoa ko e ‘Sunia’ (fakahā ‘e ha kāinga ki he Keleʹá) ke fakahaofi ha kiʹi leka naʹe tafia ‘e he ‘aú ‘one lolo ki ha foʹi ava ‘i he ‘uluʹulú fakafuofua ki he mita ‘e 80m ki he 100 mei he ‘oneʹone ‘o e matātahí.

Naʹe aʹu pē ‘a Sunia ‘one siʹi fakaʹatā mai ‘a e leká mei he avaʹi maká pea ‘i heʹene feinga kena kakau foki ki ‘utá naʹe toe mālohi ‘aupito ‘a e tafe ‘a e ‘aú mo e peaú ‘o tafia kinaua ‘o faaki ki he maka ‘o e ‘uluʹulú ‘o homo ai ‘a e leká mei hono nimá.

Taimi ko ení naʹe toe feinga atu mo ha matāpule taʹu 36 naʹe ‘i he matātahí he taimi naʹe hoko ai ‘a e faingataʹá ke tokoni kia Sunia mo e leká ka naʹe iku heni ke tafiʹi kotoa kinautolu ki he tuʹa ‘uluʹulú ki he lolotó.

Naʹe fai leva ‘a e fetuʹutaki ki ha tokoni ‘o ui ai ki he ‘api polisi ‘i Nukunukú pea naʹe mavahe atu ha vaka pē ‘i he feituʹú ni ‘o malava ‘o haofakiʹi ‘a e kiʹi leká ‘okú ne kei moʹui pē mo e matāpule taʹu 36 ka ko Sunia naʹá ne ‘osi pekia he taimi ko ení pea maʹu hono sinó ‘oku tēkina he tahí.

‘Oku hoko atu ‘a e fakatotolo ‘a e kau polisí mo fakatatali ki he līpooti ‘a e toketaá ke toki makatu’unga mei ai ‘a e fakatotolo tenau fakahokó.

Na’e pehē ‘e he kāinga ‘o e pekiá, ko ‘ene mālōlō ‘oku kei mo’ui pē ‘a hono uaifí mo ‘ena ki’i ta’ahine ‘e toko taha.

From: kele’a tonga ltd

Comments

comments

Share.