FAKAHOKO E LALAVA ‘I PALASI KIHE TAUMAFA KAVA HE HILIFAKI KALAUNI

0

KOE LALAVAA KO E AATI IA ‘A TAMALE MEI ONO‘AHO: “Ko Tamale mo e Lalava”: Kuo finangalo ‘a ‘Ene ‘Afio, King Tupou V1, ke me‘a mai ‘a e ‘Eiki ‘o Niutoua – ko Tamale mo hono tehina, Uasila‘á mo e ongo matu‘a ‘e toko ua ki he Palasi ‘o ‘Ene ‘Afioo ‘i loto Nuku‘alofa he Falaite mo e Tokonaki (Sune 5 & 6) uike kuo ‘osi ke fakahoko ‘a e lalava he Palasi ‘afio‘angá ‘o e Tama Tu‘i ki he Taumafa Kava ‘oku ‘amanaki ke fakahoko lolotonga e katoanga hilifaki Kalauni ‘o e Tama Tu‘i he mahina ko Siulai ‘o e ta‘u ni. Ko e Lalava ko e aati (art) pē ko e faiva ia ‘a Tamale mei ono‘aho. Pea ko e faiva pē ia ne fakahoko ki he Tu‘i Tonga ‘o ‘ono‘ahó, pea ‘oku a‘umai pē ia ki he Tu‘i lolotongá he kuo katoa ‘a e ha‘a Tu‘i ‘e tolu ‘i he Tu‘i lolotongaá. Na‘e ‘ikai ko ha faiva ne kouna‘i mei Fale Lahi ‘i he ‘aho ko ia, ka ko e fakahikihiki ‘a Tamale ki hono ta‘oketee he‘ene ‘i he tu‘unga Tu‘i Tonga. Pea  ‘oku kei fakahikihiki pe ‘e Tamale ‘a e Tu‘i lolotonga he ko hono kainga ofi mei ono‘aho. Ko e “lalava” ko e aati (art) ia ‘a hou‘eiki pea ‘oku ‘ikai ke ‘ai‘ainoa‘ia pe fai noa‘ia ‘e ha taha peé. Na‘e lalava pe ‘e Tamale ‘a e ‘afio‘anga ‘o e la‘a kuo too – ‘a Kuini Salote ‘i Kauvai. Pea na‘á ne lalava pea mo e ‘afio‘anga ‘i Fua‘amotu ma‘ae La‘aa kuo toó, King Taufa‘ahau Tupou IV. Pea na‘á ne toe fakahoko pe ‘a e lalava he fale ‘afio‘anga ‘o e Tu‘i lolotonga, Tupou VI ‘i Liukava, Kolovai he 1990 tupu. Pehē ‘e he mokopuna ‘o Tamale – Tapukitea Lolomana‘ia, ne folofola pe ‘a e tama Tu‘i lolotonga‘okú ne kei Pilinisi Lavaka Ata ki he ‘api nofo‘anga ‘o Tamale ki Niutoua koe‘uhí ko ‘ene finangalo ke ‹lalava› hono Palasi ‘afio‘anga fo‘ou ‘i Liukava. ‘Oku ‘afio‘i ‘e he Tu‘i mo e hou‘eiki, ko e art ia ‘a Tamale. Ka neongo koe faiva ia ‘a Tamale, ki he Tu‘i Tongá mo Hou‘eiki, ka na‘a ne loto toó kene faka‘inasi‘aki ‘a e ngaahi falelotu ‘o e ‘Otua Mo‘uii ‘a ‘ene lalava ‘i he ngaahi ta‘u faka‘osi‘osi ‘o e senituli 19 mo e kamata‘anga ‘o e senituli 20. Ko e ‹lalava› ‘oku fai ia ‘i he fale ‘o e tu‘í he ‘oku ‘i ai hono ‘uhinga pea mafana mo malu ai. Pehē ‘e Tapukitea: “‘Oku ‘ikai ke tu‘u noa‘ia holo ia ‘i tu‘a ke ‘uheina mo havilingia”.

Ko Tamale (Pita) ‘a e Tamale na‘e lahi taha ‘ene ‘lalava’ ‘i ha toe Tamale ki mu‘a atu, ‘aki peé, he na‘e laumālie fuoloa pea ko e tangata‘eiki vekeveke ke fakahoko hono fakalangilangi‘i ‘o e Tu‘i mo e Kuini ‘i he‘ene tufunga lalavá. Na‘a ne toki pekia he 1999. Toe pehe foki ‘e Tapukitea, “‘Oku hala ‘aupito ‘a e taku‘‘o pehē ne mole ‘a e lalava pea pulia ‘o ‘ikai toe fai ‘e ha taha. Ko e lau ia ‘a e tokotaha palangi mei Nu‘usila. Pea ne pehē, mālō mo Filipe Tohi ke ne fakaakeake ‘a e aatit ko ‘eni he ne ‘osi mole ia. ‘Oku mahino heni ‘a e ‘ikai ke lave‘i ‘e he motu‘a mulí ko ‘ení ‘a e ngaahi me‘a mo e tukufakaholo ‘a e sosaieti Tongá. Pea hei‘ilo pe ko ‘ene ma‘u mei fē ‘a e talanoa ko ia.” “Ne ‘ikai pē ke mole ‘a e lalava ‘i ha kuonga. Ne nofo pē ia mo Tamale. Ne ‘ikai ke pulia ia ‘o hange ko ia ‘oku takú. Pea ‘oku ‘ikai ke lave‘i ia ‘e he kakai tokolahi ‘oku ‘i ai ha aati peheé ‘i Tonga. He na‘e ‘ikai ke fai ‘a e aati ia ko ‘ení ki ha fale ‘o ha lauvale.” “ Na‘e ‘uhinga pē ia ke fai ki he fale ‘afio‘anga ‘o e Tu‘í. He ko e Tu‘i pe taha ne ‘i ai hono fale lalava. ‘Ikai ha toe taha kehe ( No one else)”.

Comments

comments

Share.