Fili Malakai Fekitoa Timi Super XV ʻoe Uiké heʻene ʻuluaki vaʻinga taʻú

0

ʻI HE fakapulipuli atu ko ʻeni ʻo etakai hono ua ʻo e feʻauhi Super XV 2015, naʻe filiʻi ai ʻe he uepisaiti ʻakapulu Planet Rugby ʻa e supasitā lele fefeka mo tuʻukimuʻa ʻa e All Blacks moe Highlanders, Malakai Fekitoa, ʻi he tuʻunga senitaá heʻenau Timi Super XV ʻoe Uiké hili ʻene fakaaoao pea toe tataʻo ʻi heʻenau fuofua vaʻinga ʻo e taʻu ní moe Crusaders.

Naʻe ʻikai toe taimi senitā Tonga All Blacks moe Highlanders, Malakai Fekitoa, ʻi heʻene hokoʻi lelei atu ʻene tuʻunga vaʻinga tuʻukimuʻa ʻo e taʻu kuo ʻosí ʻi heʻenau ʻuluaki vaʻinga ʻo e taʻú he Tokonakí moe Crusaders, ʻaki ʻene huuʻi hangatonu tifeni e Crusaders ʻo fakahoko taha ongo tataʻo ʻa e Highlanders kaeʻumaʻā ʻene toutou avangi laine tifení pea mo ʻene toutou fakangalivaleʻi kau tifeni ʻa e Crusaders.

ʻOku hahanga atu ʻa Malakai Fekitoa ki ha toʻu vaʻinga fefeka mo feʻauʻauhi moʻoni moe toenga ʻo e kau senitā ʻa Nuʻu Silá, ki he ngaahi tuʻunga senitā ʻa e All Blacks ʻi he teuteu atu ko ʻeni ki he feʻauhi Ipu ʻa Māmaní ʻi Sepitemá. Pea ko e vaʻinga tuʻukimuʻa naʻe fakahoko ʻe Malakai Fekitoa he fakaʻosinga ʻo e uiké ko e kamata lelei ʻaupito ia ki heʻene ngaahi feinga vaʻinga ʻo e taʻu ní.

Lolotonga hono siofi ʻe he kau vaʻinga All Blacks ʻa e feʻauhi Ipu ʻa Māmaní kaeʻumaʻā ʻa e tokolahi ʻo kinautolu ʻokú nau teuaki ke ʻaukolo atu ki ʻIngilani Falanisē mo Siapani he fakaʻosinga feʻauhi Ipu ʻa Māmaní, kuo fakamoʻoni konituleki ai ʻa Malakai Fekitoa ia moe ʻIunioni ʻAkapulu ʻa Nuʻu Silá pea mo Highlanders ʻo toki ʻosi ki he 2017, ʻa ia te ne ala hoko ai ko e senitā fika ʻuluaki ʻa e All Blacks ʻi he taimi ʻe mavahe atu ai ʻa Conrad Smith mo Maʻa Nonu ki Falaniseé.

Timi Super XV ʻoe Uiké ki he takai hono uá; 15 Lachie Turner (Reds), 14 Taqel Naiyaravoro (Waratahs), 13 Malakai Fekitoa (Highlanders), 12 Charlie Ngatai (Chiefs), 11 Julian Savea (Hurricanes), 10 Bernard Foley (Waratahs), 9 TJ Perenara (Hurricanes), 8 Stephen Hoiles (Waratahs), 7 Marcell Coetzee (Sharks), 6 Adam Thomson (Reds), 5 Pieter-Steph du Toit (Sharks), 4 Scott Barrett (Crusaders), 3 Ben Alexander (Brumbies), 2 Bismarck du Plessis (Sharks), 1 Reggie Goodes (Hurricanes). Kaekehe, mei he ngaahi timi ʻoe Konifelenisi ʻAositelēliá hili ʻa e takai hono uá, naʻe filifili ai ʻe he uepisaiti Rugby Heaven ʻa e Timi Super XV ʻAositelēlia ʻo e Uiké ki he takai hono uá ʻo nau fili ai ʻa Israel Folau ʻi he leʻokoló pea mo Saia Faingaʻa ʻo e Reds ʻi he huká. Naʻe tuʻukimuʻa ʻaupito ʻa e vaʻinga ʻa Saia Faingaʻá ʻa ia naʻá ne takiʻi pea mo ʻenau matatolu Tongá, Sam Talakai, hono toutou tekelele ʻe he Reds ʻa e Force ʻi he sikalamú ʻa ia ne ikuna maʻu ai ʻa e foʻi tautea tataʻo e Reds. Ko Israel Folaú ʻoku tuʻukimuʻa ʻaupito pē ʻene vaʻingá ka koeʻuhí ko e sio maʻolunga ʻa e kakaí kiate iá mo ʻenau ʻamanaki te ne tataʻo ʻi he taimi kotoa ʻoku ala ai ki he pulú, ʻoku hangē ai ʻoku ʻikai fuʻu tuʻukimuʻá ʻene vaʻingá. Ka ʻi hono fakamāʻopoʻopo ʻo e ngaahi vaʻinga fakauiké ʻi he uepisaiti ʻa e SANZAR, ʻoku takimuʻa tuʻukimuʻa ʻaupito ʻa Israel Folau ia ʻí he ngaahi sitētisitika vaʻingá hangē ko ʻene fika ʻuluaki he lele pulu lahi tahá (carries ʻe 8), fika ʻuluaki he offloads (offloads ʻe 8), fika tolu hono avangi tifení (defenders beaten ʻe 7), fika ua he mita lele pulu lahitahá (runnings metres ʻe 210m). Ko e tataʻo lahitahá ʻoku kau ʻa Lopeti Timani he fika ʻuluakí moe tataʻo ʻe ua.

Kele’a Sports

Comments

comments

Share.