Teʻeki liliu misi moe fakaʻamu Manu Vatuvei ke vaʻinga maʻae All Blacks

0

KUO fakahā ʻe he kapakau tuʻukimuʻa mo tataʻo lahitaha ʻi he hisitōlia ʻo e timi Kiwis ʻa Nuʻu Silá, Manu Vatuvei, ʻi he teuaki ke kamata ʻa e taʻu fakaʻosi heʻene konituleki moe Warriors, ʻoku teʻeki ai haʻane holomui pē sītuʻa mei heʻene misi, ʻamanaki mo fakaʻamu ke vaʻinga maʻae All Blacks.

ʻOku teʻeki ke kamata ha alēlea ekauʻaki mo hano fakalōloa ʻo e konituleki vaʻinga ʻa Manu Vatuveí ʻa ia naʻá ne takimuʻa he tataʻo lahitaha maʻae Warriors ʻi he toʻu vaʻinga ʻe valu hokohoko kuo toki maliu atú. Neongo ʻa e kei fakaʻamu pē ʻa Manu Vatuvei ke nofo ʻi he Warriors (kapau ʻe ʻoange he Warriors ha ‘ofa aleapau vaʻinga lelei), Naʻá ne fakahā ʻene mateuteu ke fakasiosio ha faingamālie vaʻinga ʻi ha feituʻu kehe ʻo kau ai haʻane tafoki ki he ʻiunioní ke fakapapauʻi ha kahaʻu lelei.

ʻI ha fakamatala ʻa Manu Vatuvei ki he ongongo Stuff Sports, naʻá ne fakahā ai ko ʻene kei tutupu hake naʻá ne manako ʻi he ʻakapulu ʻiunioní pea mo ʻene palani ke tui ʻa e falani All Blacks ha ʻaho. “Naʻá ku tutupu hake ʻo sio mo vaʻinga ʻakapulu ʻiunioni … ko ʻeku misí maʻu pē ke vaʻinga maʻae All Blacks,” ko e lau ia ʻa Manu Vatuveí. Naʻá ne fakahā ko Jonah Lomu ʻa e supasitā naʻá ne sio ki ai mo hoko ko hono faʻiaʻitakiʻanga mo ʻAitolo. Ko e vaʻinga maʻae All Blacks ʻoku teʻeki matoʻo mei heʻene fakakaukaú pea neongo ʻa ʻene fakaofi ki he ngatangataʻanga ʻo ʻene vaʻingá (career) pea mo hā ngali taʻemalava ʻene misí mo ʻene ʻamanakí, fakatatau ki he fakamatala lotolahi ʻa Manu Vatuveí. Naʻe toe fakahā ʻe Manu Vatuvei ʻoku ʻikai ha meʻa ʻe taʻemalava pea ʻoku ʻikai ke ne taʻetui mo fehuʻia meʻa te ne malavá.

Ka ikuna ʻa e feinga e Warriors ke afeʻi mai ʻa Jason Taumalolo ki he Warriors ʻaki e paʻanga lēkooti ofi he $1.5 miliona he taʻú, ʻe ala kau ʻa Manu Vatuvei hono holoki ʻenau konitulekí pe ko hono tuku ange koeʻuhí ʻe ala manifi ange tuʻunga fakapaʻanga ʻa e Warriors. Koeʻuhí ko e tuʻunga ko ʻení, ʻoku ʻi ai faingamālie ʻo Manu Vatuvei ke mavahe mei he Warriors moe ʻakapulu liikí. Pea kapau ʻe hoko ʻo ne tafoki ki he ʻakapulu ʻiunioní, ko hono faingamālie fakaʻosi pē ia ki he All Blacks koeʻuhí ko hono taʻu motuʻá (taʻu 29).

Kele’a Sports

Comments

comments

Share.